Avropa İttifaqı (Aİ) Rusiyanın Ukraynaya təcavüzünün ildönümündə Rusiyaya qarşı 13-cü sanksiyalar paketini razılaşdırıb.
Toplum TV xəbər verir ki, bu barədə fevralın 21-də Aİ-nin rəsmi saytı məlumat yayıb.
Bildirilir ki, ən şaxəli sanksiya paketlərindən biri olan 13-cü paket Rusiyanın Ukrayna qarşı işğalının ildönümündə, fevralın 24-də təsdiqlənəcək.
“Sanksiyalarla bağlı razılaşmanı alqışlayıram. Putinin hərb maşınının deqradasiyasına davam etməliyik. Siyahıda 2000 nəfərin adı var, biz Kremlə qarşı təzyiqi yüksək səviyyədə saxlayırıq, Rusiyanın imkanlarını azaltmağa davam edirik”, – Avropa Komissiyasının sədri Ursula fon der Leyen X-də yaydığı açıqlamada bildirib.
Qeyd edək ki, bundan əvvəl ABŞ rəhbərliyi Aleksey Navalnının həbsxanada ölümü və Ukrayna qarşı işğalın ildönümü ilə əlaqədar Rusiyaya genişmiqyaslı sanksiyaların tətbiq ediləcəyini açıqlamışdı.